作者：郝明義[Hok-bîng-gī]
插圖：張妙如
出版社：網路與書出版
出版日期：2007年05月03日
語言：繁體中文 ISBN：9789866841026
裝訂：平裝
定價：280箍。佇Soidea七九折網購
頁數：255
「搜主義」(www.soidea.com.tw)規模卡細，拚俗搶生理，袂佇網頁註明存貨。是先接單，才想辦法去吊冊。定定愛等一兩禮拜才提會著，像我共買《越讀者》著是按呢。提有閣算好，有時，一段日子過去，才通知汝講吊無貨。
頭拄仔去看，發現伊改變做法，講「搜主義網書自即日起調整營業型態，轉為提供搜主義選書及市場新書銷售，書種上有所限制，卻希望提供您更專精、更迅速的購書服務」。伊開始限制書目，本來查有《越讀者》，即馬查無矣。看範勢[pān-sè]，拚俗正實做袂久長。儂講「俗卸卡贏寄[Sio̍k-sià khah iânn kià]」，當今个世界是無貨先搶單。
郝明義是台灣不止重要个出版人。我過去對伊無啥知，看即本冊，才發現以前注意著古lok-su̍t古个商務印書館會開始革新，原來是伊接手塊huānn个時所做个（總經理兼總編輯）。
插圖是《交換日記》系列个作者之一張妙如畫个。伊袂輸是徛佇作者佮讀者中間，用卡倚讀者个立場塊激肝田[kik-kan-tiân]講寡五四三个感想，予即本冊加添一寡輕鬆親切感。
毋閣郝明義干那佇後記講，佇真kiap个情形下，同意共這本冊做插畫个張妙如，予這本書加一份原底所無个感覺，佇遮共伊說謝。按呢扑算郝先生並無蓋看重[khuànn-tāng]張小姐對即本冊个貢獻个款。
郝明義 先談論台灣个教育體制對「閱讀」[ua̍t-tho̍k]風氣所造成个不良个影響。
2001年針對台北市、台中市、高雄市20歲以上个民眾所做个調查，讀冊个動機內底，「為著訓練獨立思考个能力」即項，普遍無儂重視。從中个大學生，除了課業要求个冊以外，偆个時間，若有看冊，永永是塊度時間、看藝量[gī-niū]个，即種情形，比別款職業个階層閣卡儕。
2007年有一場有關閱讀个研討會，詹麗萍發表講，台灣个大學生所看个冊是以休閒[hiu-hân]佮通俗个為主，罕得看經典名作，嘛真少去讀專業性、學術性个冊。可見即十年來个大學生攏共樣。
但是伊並無針對這提出啥乜解決个辦法，只是鼓舞讀者講，讀冊是一世儂个代誌，早開始有早開始个優勢，慢開始有慢開始个美妙。
伊講，除了愛情，無任何代誌像閱讀[ua̍t-tho̍k]按呢，予咱感覺晏[uànn]來个開始嘛會凍遮爾美好。
郝明義个觀點真包容。親像伊創立Net and Books，看名著知伊對新時代个網路對書冊即種傳統个資訊媒介有正面个相輔相成[siong hū siong sîng]、相傍相晟[sio pn̄g sio tshiânn]个作用。伊對書冊本身个逐種類型，嘛是一方面肯定伊个價值，一方面提醒伊个風險，並無任何一種是全然利益抑是全然敗害。
總是，愛有應伨[ìn-thīn]个配搭來享受各種精神上个食食[tsia̍h-si̍t]，嘛愛提昇眼光、培養品味通好[thang-hó]對某一種類型个冊內底揀出卡高明个作品，卡袂浪費性命。
伊是用「飲食」做比喻，將讀冊行為个型態分做「主食、美食、蔬果[soo-kó]、甜食」四類。
為著解決現實問題來讀冊，是主食閱讀。
為著瞭解事物个本質，得著性命深處个共鳴佮思想深處个結晶來讀冊是美食閱讀。
使用工具冊來查考資料是蔬果閱讀。
正頓食了，食寡甜=个紲喙尾[suà-tshuì-bué]，淡薄仔讀寡消遣冊，這是甜食閱讀。
即四種逐項攏有需要，嘛愛撙節[tsún-tsat]，毋通偏食。
論到冊个書寫種類，伊舉出小說、詩、哲學、歷史、圖像與漫畫、影像。每一項攏真有滋養[tsu-ióng]，請逐家攏去共斟酌[tsim-tsiok]體驗看覓。
論到讀冊个方法，伊舉出古早四个爻儂所提起个四種方法，陶淵明不求甚解、諸葛亮觀其大略、朱熹熟讀精思[sio̍k-tho̍k tsing-su]、蘇東坡八面受敵[pat biān siū ti̍k]。
伊認為每一種攏有伊个路用，咱愛會曉活用來讀無共性質个冊。有時針對一本好冊，看第一遍是觀其大略，第二遍是不求甚解，到第三遍才會凍熟讀精思。
伊嘛介紹現代西洋儂閣卡精密有系統个讀冊方法。
號做《越讀者》即種奇巧个名，「越[ua̍t]」--字佮「閱[ua̍t]」--字，華語共音，台語漳州腔嘛拄好共音（泉州音个「閱」是ia̍t。）
按呢號，是卜表達伊个主張－－閱讀是超越現實，望進[bāng-tsìn]理想佮夢想[bāng-sióng]；閱讀嘛是超越各種媒介、型態、種類、主題佮方法。
"Read the word"，同時亦是"Read the world"，閱讀予咱會凍不管時，隨手畫一个「任意門」，瞬息間轉移空間，入去任何一个新世界。
作者講，著準是愛情，嘛袂凍親像閱讀按呢予咱感覺，hānn過界个行為，會使遮爾新奇。
咱塊閱讀，有時講做是「博」，其實只是散漫；有時講做是「專」，究真[kiù-tsin]只是狹揳[e̍h-kheh]。
卜建立閱讀个金字塔，伊鼓勵儂著愛先選一个家治有興趣个小主題，研究甲相當有心得个坎站[khám-tsām]。然後做一个驗收，有才調徛佇一間大冊店內底，巡視怹佇即个主題所排出來个冊，講出怹个欠缺[khiàm-khueh]。而且去看當今即个主題个權威上新个文章，會凍理解，閣佮怹對話。
卜做好額儂，著愛先粒積一百萬，用這做母銀[bó-gîn]，錢咬錢，才會趁大錢。卜做一个閱讀个富翁，共款愛先充份掌握一个主題，用這當做汝个第一桶金子，才有法度累積智識个財富。
作者對各種角度探討閱讀即項物件，伊不時用譬喻[phì-jū]來予儂曉悟[hiáu-gōo]。最後，伊畫出伊心目中閱讀个七个gám仔（「閱讀的七個階梯」）。
第一gám：汝關心、思考个，是按怎予家治卡美好。
第二gám：汝開始關心、思考，按怎予家治佮所愛个儂，同齊卡美好。
第三gám：汝開始學習欣賞一切抽象个美好。
第四gám：汝開始學習欣賞社會制度个美好。
第五gám：汝開始學習欣賞佮家治各樣[koh-iūnn]个行為个美好。
第六gám：汝開始學習體會多元智識相激發[sio kik-huat]个美好。
第七gám：汝開始學習體會宇宙个智慧之美。
寫到遮，已經是峘拄天[kuân-tú-thinn]个理想之論。總是，無按呢，無夠額表達出作者心肝內迄个「閱讀全圖[ua̍t-tho̍k tsuân-tôo]」。
世間永遠只有極少數儂真正達會到迄種境界，咱做一个普通儂，檢采是予張妙如个漫畫siânn--著，才會去掀看即本冊。毋閣，只要汝撥一兩工仔歇睏日，好好仔讀完即本冊，保領[pó-niá]汝會凍得著一寡仔啟發，產生一屑仔想卜讀冊个好奇心，學著幾項仔選冊、讀冊个撇步。
