早安財經文化2008年出版，生涯新智慧系列019，何啟宏譯。
冊皮廣告講是「日本最有創意的」《教養設計學－－如何輕鬆教出好孩子》，其實只是一種建立佇日本傳統迄種親密互動个人際精神个教養法，共伊做現代化个包裝。
總是，伊講个，毋是無理氣。像我國小四年以後，阮厝新起三棧樓，逐工食暗飽，父母著趕我起去二樓讀冊，怹佇樓跤繼續無閒做生理，樓頂佮樓跤就按呢隔斷。我去睏个時，怹閣佇樓跤，抑未關門歇睏起來樓頂。我迄站仔，拄好受著一寡鬼仔故事冊个不良影響，逐暗孤一儂kiu佇樓頂phī-phī掣，驚惶無儂知，痛苦無塊投。這對我一生个傷害毋是小可。
當然，這袂使牽拖父母啦，生活環境著是按呢。我家治到甲高中畢業，佇山頂寺院用心讀《傳習錄》，對「物各付物」个道理淡薄仔開悟，尾手才卡自在。
The Curious Incident of the Dog in the Night-time. 林靜華譯，大塊文化2005出版，to (fiction)系列32。
Siat-thái仔好看个一部小說，第一人稱个主角是一个自閉症个查埔囡仔。看過即本，我才開始對autism有一點點仔起碼个認捌。即本冊佇聽講佇國外連鞭著銷出去五百萬本以上，有寡「無及格」个父母，看過即本冊，對家治厝內有自閉症个囡仔奇怪个行為佮表現，才卡會凍了解。
我閣去揣別本冊來看，親像Thinking in Pictures - My Life with Autism, by Temple Grandin，閣有《火星上的人類學家》，兩本抑未看了。
《綠光往事》，詹宏志著，馬可孛羅2008出版，旅人之星37。這是詹先生近年个第二本散文集
第一本是《人生一瞬》，2006出版。
詹宏志是一个讀萬卷書、行萬里路个文化人，伊是台灣出版界、文化傳播界極重要个人物。讀伊談論個人生長、閱讀、旅遊、食好物个散文，比看伊早期个《趨勢索隱》、《趨勢報告》、《城市人》、《城市觀察》，加有另外一種親切个感動。
郝明義有共詹宏志訪問過，發表佇《他們說－有關書與人生的一些訪談》，通好對看參考。
伊个《創意人》佮其他幾本舊作，我抑未看。
2023註：詹先生也是一位成功个生理儂，伊个電商網站 pchome 是台灣第一大个，最近才予 momoshop 拚過。
郝(Hok)明義是台灣出版界个大人物，三十統歲著做時報出版公司个總經理，四十歲做台灣商務印書館的總經理兼總編輯，閣開一間家治个出版社「大塊文化」，日--時經營別儂的公司，暝時主持家治的公司，驚死儂！
《工作DNA》著是塊談論伊个工作觀，按照做頭路儂个三種階段：菜鳥仔、中級幹部、主管，分層來發揮伊个體驗。即本冊不止有銷。
大塊文化即間出版社，無的確通儂知，但是有一本冊，只要有塊踅冊店个儂攏會知－－《最後十四堂星期二的課》。即幾年台灣出的冊，無論是原創个、翻譯个，攏真愛用「數字」做冊名，扑算著是即本冊鼓動起來个。
郝先生本儂个文筆亦好，事業的規模亦好，佮另外一个奇才詹宏志比，雖是卡輸分數(hun-siàu)，總是，怹兩儂攏對華文出版貢獻真大。
《越讀者》、《工作DNA》掠外，伊个冊我閣看過《他們說--有關書與人生的一些訪談》、《故事》、《那一百零八天》、《一個牡羊座的金剛經筆記》。伊歸本个冊，應該我攏看過矣。
