The Curious Incident of the Dog in the Night-time. 林靜華譯，大塊文化2005出版，to (fiction)系列32。
Siat-thái仔好看个一部小說，第一人稱个主角是一个自閉症个查埔囡仔。看過即本，我才開始對autism有一點點仔起碼个認捌。即本冊佇聽講佇國外連鞭著銷出去五百萬本以上，有寡「無及格」个父母，看過即本冊，對家治厝內有自閉症个囡仔奇怪个行為佮表現，才卡會凍了解。
我閣去揣別本冊來看，親像Thinking in Pictures - My Life with Autism, by Temple Grandin，閣有《火星上的人類學家》，兩本抑未看了。
《綠光往事》，詹宏志著，馬可孛羅2008出版，旅人之星37。這是詹先生近年个第二本散文集
第一本是《人生一瞬》，2006出版。
詹宏志是一个讀萬卷書、行萬里路个文化人，伊是台灣出版界、文化傳播界極重要个人物。讀伊談論個人生長、閱讀、旅遊、食好物个散文，比看伊早期个《趨勢索隱》、《趨勢報告》、《城市人》、《城市觀察》，加有另外一種親切个感動。
郝明義有共詹宏志訪問過，發表佇《他們說－有關書與人生的一些訪談》，通好對看參考。
伊个《創意人》佮其他幾本舊作，我抑未看。
2023註：詹先生也是一位成功个生理儂，伊个電商網站 pchome 是台灣第一大个，最近才予 momoshop 拚過。
郝(Hok)明義是台灣出版界个大人物，三十統歲著做時報出版公司个總經理，四十歲做台灣商務印書館的總經理兼總編輯，閣開一間家治个出版社「大塊文化」，日--時經營別儂的公司，暝時主持家治的公司，驚死儂！
《工作DNA》著是塊談論伊个工作觀，按照做頭路儂个三種階段：菜鳥仔、中級幹部、主管，分層來發揮伊个體驗。即本冊不止有銷。
大塊文化即間出版社，無的確通儂知，但是有一本冊，只要有塊踅冊店个儂攏會知－－《最後十四堂星期二的課》。即幾年台灣出的冊，無論是原創个、翻譯个，攏真愛用「數字」做冊名，扑算著是即本冊鼓動起來个。
郝先生本儂个文筆亦好，事業的規模亦好，佮另外一个奇才詹宏志比，雖是卡輸分數(hun-siàu)，總是，怹兩儂攏對華文出版貢獻真大。
《越讀者》、《工作DNA》掠外，伊个冊我閣看過《他們說--有關書與人生的一些訪談》、《故事》、《那一百零八天》、《一個牡羊座的金剛經筆記》。伊歸本个冊，應該我攏看過矣。
今仔日去日新戲園看Harry Potter and the Half-Blood Prince，閣去萬代福看末日預言[Bua̍t-ji̍t Ū-giân] "Knowing"。第六集个Potter電影有夠歹看，做甲無lám無le̍h，看彼無彩工閣無彩錢。好佳哉有另外看著卡有意思个末日預言，而且佇無意中，看著即兩phō个關聯。
啥乜關聯？佮聖經个關聯。西洋儂佮聖經个關係，sian剝to剝袂lī。文藝創作者，幾千年佇遐捙跋píng，無了時，局不局[kio̍k-put-kio̍k]嘛是愛對聖經取素材來利用。即兩phō影戲，不約而同[put-iok jî tông]，攏用著舊約內底个The Chosen One(s)个概念[khài-liām]。
在阮異教徒來看，即兩phō電影个「作者」，對即種概念个表現，傳達出一種予儂感覺全然無助[bû-tsōo](helpless)个樣態[iūnn-thài]，身為一个有某種程度个自由意志个人類，予上帝揀召[kíng-tiàu]--著 亦好，無予揀召-著 亦好，攏是生命[sing-bīng]極大[ki̍k-tuā]个無奈。伊欲揀召汝、毋揀召汝，毋是汝會凍佮伊pué-huē个代誌。予揀召--著，佇箍仔內个極少數儂，欲按怎面對無予揀召--著，佇箍仔外个極多數儂咧？咱毋是互相無tī-tāi个存在，咱是親儂、朋友、厝邊，抑是互相依存个地球儂啊！
Harry Potter 6內底，善惡兩个陣營，共款攏有The Chosen One，受揀个儂，雖然有家治个意志，但是共款攏無可能推會lī身。無奈啊！痛苦啊！
末日預言內底，受揀个儂，會凍有自由意志拒絕受揀。女主角姻老母，扑算是袂當忍受目睭金金看家治至愛个查某囝，屬佇無hông揀召--著，註該死無[sí-bô]个迄類，家治獨活[to̍k-ua̍h]袂過心，只好用自殺來拒絕伊家治个受揀。
末日預言詮釋[tshuan-sik]聖經个方式，著親像我晉前所講个，將迄个日--時降雲柱[hûn-thiāu]、暝--時出火光个耶和華上帝解說做是駕駛太空船个外星儂。
網路頂看著，有儂佮意英雄救世个老套，所以對末日預言結局，主角白了工，無救著地球的戲文安排蓋袂爽，閣佇戲園內大聲tshoh罵。實在真好笑。
Tshian-tú-tshian，今仔日我身軀頂，拄好phāinn一本白話字聖經！毋閣，電影內底引用个以西結迄本，我愛閣相當期日才讀會到遐。總是，我掀去遐看一下，又閣讀著按呢个話句：
「所以我用我个痛恨摒佇怹个頂面，用我大受氣个火滅怹；照怹所行个，報應佇怹个頭殼頂；這是主耶和華上帝講个。」（以西結22: 31. 白話字聖經舊約第937頁）
看完頭前兩百統頁个我，跳到937頁猶原看著共款來自上帝个「受氣、報應、火、滅」个字眼，按呢，我是毋是應該會使出結論講：無錯，舊約个上帝，有影親像我想个，是一个直來直去，對好儂慈悲、對歹儂殘忍，隨時會生養[sing-ióng]一切，嘛隨時會勦滅[tsâu-bia̍t]一切个神？
檢彩按呢个上帝，著是一寡虔誠个基督徒，怹會投入政治運動，攑軍器抵敵[tí-ti̍k]不義个精神力量个來源。親像傅雲欽先生按呢，套用聖經个話句佇政治个現況[hiān-hóng]，來表達伊欲消滅賣台者[bē-tâi-tsiá]个決心。
佛教卡無即種个，一--來是教義各樣；二--來是若有按呢做个，扑算攏予儂歸類做「附佛外道[hū-hu̍t guā-tō]」去矣，親像白蓮教[Pi̍k-liân-kàu]遐个。兩項因素交互影響。
按呢，即兩phō影戲个作者，到底會予「正統」个基督教歸類做「附聖經个異端」袂？怹是毋是藉[tsià]聖經塊反聖經？怹有uai-tsuāi聖經个教義無？怹是毋是予撒旦揀召--著个儂，這毋是我現時个程度會凍議論个。
「世界末日」个可能性，予蓋濟儂塊peh-pak。總是，我想，若逐家同齊死滅，嘛是好。卡應該恐怖驚惶个，應該是儂儂會死，而且有个先死、有个慢死這層通儂知，無儂疑个代誌！欲按怎？欲按怎？
