東大特訓班(1)(2)

《東大特訓班》三田紀房[sam-tiân kí-pông]畫，2003年講談社《週刊Morning》連載，台灣東販中文版。

日本个升學壓力比台灣扑算有卡大。我高中就捌看過一齣日本連續劇[ki̍k]，做一个三流大學个查甫學生去做家教，予一个對人生絕望个高中囡仔tsiáng志扑拼，考入去一流大學。經過tsiah儕年，看著《東大特訓班》即phō，主題嘛是大同小異[tāi-tông siáu-īnn]，轉來查資料，知影有改編做電視劇，檢采我古早看个迄齣日劇嘛是改編--來个。

《東大特訓班》个介紹，請直接去看中文版Wikipedia个「東大特訓班」條目，寫了有夠工夫，扑算的確是 manga otaku（bàng-gah御宅族[gū-the̍h-tso̍k]）个手筆。

卜觀照即本冊，有三大層次。第一層是技術、第二層是青年、第三層是哲學。技術个意思是指學習、讀冊、升學考試个原理、方法、要訣。青年是講青少年佇現代社會，卜按怎面對伊个人生，有一个生存个目標佮意義。哲學層次就是無限程度來批判即phō冊所傳達个人生哲學。

就現時現境个我個人來講，目前看完即兩本，予我个啟發是，愛有意識來設計卡有效率个讀冊、學習、研究策略，為著我最後个目標－－以台語文化做中心主題，又深又闊來成就學問。另外，佇教學上，共款愛設法一寡具體閣特別个方式來鼓舞佮訓練學生。