第一影城

第一遍去台中車頭前个第一影城看二輪片。遐卡濟五色儂[ngóo-sik-lâng]塊出入，佮萬代福卡濟學生囡仔有縒[tsua̍h]。

雖罔是車頭前、市中心，彼是一棟不止衰颯[sue-sap]个大樓。電梯gám仔个縫--仔，一tsuā一tsuā，kha̍h真濟lah-sap，予我想著一般正常經營个百貨公司，會凍維持甲遐清氣，清潔人員个苦勞。

第一影城內底有八廳，十六支片（？）塊放送。一張票百一箍予儂看一工，半中tn̂g會使行出來，伸手盤予顧口--个tǹg一个印仔，出外lau-lau咧才閣入去看，算是不止利便。另外閣送飲料、磅米芳、撞球點數有个無个，彼我無用著。

影城內底个建設，有卡倚近定定佇我夢中出現个款式矣。總是，我想，夢中个戲園，古古，佮第一影城个舊舊，各樣。彼應該是我頂世儂所去的跡[jiah]。

下昏暗看兩齣，「守護者」、「橫山家之味[Hîng-san--ka tsi Bī]」。

戲園敗市嘛有年矣。第一影城儂客幾个仔，伊用種種个優待勉強弓椆咧，毋知會通tòng到ti̍h時？

電影院扑算是一个烏暗个所在，即號半舊lo̍h个，閣卡是按呢。

啥事欲去看電影？

我个身、心，欲按怎安立？