Adobe Contribute CS3真趣味，將歸个blog个形體掠落來咱家治个電腦，據在咱煎爨[tsian-tsuán]。毋閣漢字佮游標對了無啥好，扑算是因為對雙字元文字个處理無夠好。
2008年6月12日 星期四
2008年6月6日 星期五
2008年6月3日 星期二
有志
有志相伨袂孤單，搰力種作無畏寒。
文化枝葉代代湠，開花結子滿四山。
Iú-tsì sio-thīn bē koo-tuann, kut-la̍t tsìng-tsoh bô uì-kuânn.
Bûn-huà ki-hio̍h tāi-tāi thuànn, khui-hue kiat-tsí muá-sì-suann.
守護母語咱文化，含藏智慧卡峘山。
殷勤研究最高段，心頭一港活水泉。
Siú-hōo bó-gí lán bûn-huà, hâm-tsông tì-huī khah kuân suann.
In-khîn gián-kiù tsuè ko-tuānn, sim-thâu tsi̍t káng ua̍h tsuí-tsuânn.
像熊一樣才好過活
冊名：像熊一樣才好過活：德國時間管理大師 羅塔爾．塞維特的「樂活」新主張
原冊名：Die Baren Strategie
作者：Lothar Seiwert（羅塔爾．塞維特）
譯者：雷啟秀
出版社：臉譜
出版日期：2006年08月06日
語言：繁體中文
ISBN：9867058356
裝訂：精裝
定價：240箍
用動物个寓言，講一寡簡單但是愛有決心才做會到个道理。
現代儂攏講做儂愛有願景、有目標，古早儂是講愛「立志」。
為著達到目標，逐工攏愛做計畫。勿予無相干个代誌，偷走汝个時間。
若有閣卡深刻个心理探討來處理我个問題會閣卡好。
冊皮寫講：
伊有時坐，有時倒，看著慢鈍，必要个時又閣緊甲哪sih-nà；伊有真hiau-pai个腹肚，伊聽好親像儂徛直行路，卻寧可做四跤虎爬；他雖然天敵真少，寒--儂卻共款選擇kiu蹛洞內冬眠；伊絕對亥在[hāi-tsāi]冷靜，知影按怎展現能力又會曉徹底放鬆。
我叫是內容會針對冊皮所寫个「熊之德」深入去發揮，並無。
100天變成晨型人的方法
作者：稅所弘
譯者：成玲
出版社：大塊文化
出版日期：2008年05月05日
語言：繁體中文
ISBN：9789862130582
裝訂：平裝
定價：280箍
冊皮看著sông-sông。但是主題足合我个需要。
即本冊講著「早起个方法」卡少，講著「早起个好--處」卡儕，包括舉出古今蓋儕成功人物个實例。
方法重要，但是意願才是關鍵[kuan-kiān]。
伊有一个觀念真趣味：早起[tsá-khí]佮晨起[sîn-khí]个分別[hun-piat]。早起是睏卡少咧，可比講，十點睏，四點起來；抑是十二點才睏，六點起床，兩種攏是睏六點鐘，睏了有效率上要緊，按呢叫做早起。但是卜愛睏會好，上好量早去睏。十至四著比十二至六卡好。抑若是「晨起」，是講早起六點半進前起來。若睏了好，六點鐘著夠額，所以理想上，是十一點睏，五點起來。
漸漸老化个我，著有體驗，半暝兩點睏，早起十點起來，精神足bái。不如十二點睏，八點起來。若是十一點進前去睏，閣卡好。
台灣諺語講「子時睏有著，卡贏食補藥」，有影。逐工上晏十點外著好通去睏矣。
細漢戇戇，看冊裡寫講囡仔儂愛九點睏，六點起。著攏九點去睏，毋閣早起煞定定睏甲袂赴讀冊，家治嘛毋知去反省改善。迄陣是有一寡心理困難袂解決，家治一儂佇樓頂，足驚鬼。逐暗攏kiu佇眠床角，驚心lún膽，足久才睏落眠。
自國中起，漸漸卡袂驚鬼矣，但是閣有其他个心理問題。一開始十一點睏，後來，著攏愛過十二點才上床。讀冊个時，停佇頭前一直背，一遍閣一遍，背千百遍，共款無信心、袂放心，毋敢讀對後壁去，tsuan9攏讀袂了，讀袂了，自然著晏睏，閣卡晏睏，嘛是讀袂了。心結敨[tháu]袂開，足痛苦。
台語講「睏晏[khùn-uànn]」个意思，是講「睏到真晏」，毋是「真晏去睏」。「睏晏」佮「晏睏」無共意思。「睏晏」有一个類義詞，叫做「鴉片睏[a-phiàn-khùn]」，檢采是因為食鴉片个儂攏睏甲真晏，跁袂起來。
幾十年來，我攏是晏睏閣睏晏塊過日，除了大三練太極拳迄段日子早睏早起以外。
讀完即本冊，我決心卜早睏早起，改變幾十年久个錯誤人生。
第一工，十點外去睏，睏到十二點外，起來放尿，tsuan9袂睏得矣，生理時鐘袂凍一時著調過來，腹肚閣kū-kū叫，真艱苦。
第二工，九點外有先啉一kheh仔牛奶，著有卡好睏矣。
作者講上理想个是十一點睏到五點，睏若好，六點鐘著夠額。按呢對我來講恐驚無啥夠。我大概愛睏七點鐘才有夠。
上床个時間勿超過十點，五點左右自動精神。按呢該當是真理想。
熱--儂，tshím五點天著phú光，第一隻鳥仔開始tsiuh-tsiuh哮。聽著鳥仔聲來起床，著毋免亂鐘仔喇。
祝福逐个儂攏有健康个人生。
當教授變成學生
冊名：當教授變成學生：一位大學教授重讀大一的生活紀實
原冊名：My Freshman Year--What a Professor Learned by Becoming a Student
作者：麗貝嘉．納珊（化名）
原文作者：Rebekah Nathan
譯者：張至璋
出版社：立緒
出版日期：2006年08月21日
語言：繁體中文
ISBN：9867416538
裝訂：平裝
定價：250箍
阮主任不sám時著咧咒讖學生仔歹教，嫌姻攏無思考能力，戇tuh-tuh。最近我个教學效果嘛無通好。看著這本冊个冊名，閣有冊皮寫講：
佇大學教冊教十五冬了後，伊發現家治愈來愈袂了解學生仔攏塊想啥乜，做啥乜。同事嘛有佮伊共款个問題：是按怎即馬个學生愈來愈歹教。所擺，伊予時光倒流[tò-lâu]，重轉去過新鮮人个生活……
完全合[ha̍h]我个迫切，著趕緊買轉來，急卜參考看美國儂个情形按怎。
台灣月娘有圓有缺[khih]，美國月娘嘛無各樣。台灣學生有个問題，美國學生亦袂免得。我以早攏叫是美國儂攏真愛佮老師討論，讀著即本冊才知影美國个大學生嘛是卡愛學生相問，足袂愛去揣老師討論，亦罕得主動去老師个研究室。
上課前無愛先看冊、考試作弊[tsok-pè]、生活無正常，攏共款有遮个問題。毋閣浪費時間佇網路个情形，扑算台灣閣卡食力。抑美國學生蓋tsia̍p參加義工團體，主要毋是有啥乜大理想，是為著以後卡有競爭力來累積資歷。
台灣啥乜攏愛綴美國，教育所費越愈[ua̍t-jú]沈重，除了是經濟大環境个問題，教育政策个影響蓋大。愈來愈儕學生塊扑工，會凍用佇學業个時間自然著少--去，而且姻來讀大學，嘛是愈向望對姻將來就業有路用。大學漸漸哪功利化，學生亦漸漸愈無佇流俗之外來獨立思考个能力佮追求超越現實个理想性。
對一个理想性大過實用性个科系，親像台語系來講，當今个世局是不止大不利。
對即本冊雖是無得著外儕實用个法度，總是，我愛有卡大个體諒來對待學生，毋通閣對姻歹聲嗽。
我想著一个廣告，一个囡仔對姻老父講：Pâ=á，汝咁知影我佇外口競爭足艱苦个？扑算阮學生心肝內，嘛會對我講：老師，汝咁知影阮來讀台語系，內外个壓力攏足大个？
2008年6月2日 星期一
孤獨六講
作者：蔣勳
出版社：聯合文學
出版日期：2008年02月01日
語言：繁體中文
ISBN：9789575227449
裝訂：平裝
定價：350箍
介紹：博客來網頁
蔣勳教授是藝文界个出名儂。伊最近出个即本《孤獨六講》又閣大銷矣。佇即本冊个頭序，伊講
「我的《孤獨六講》在可懂與不可懂之間，也需無人聆聽（按：扑算是「也無需人聆聽」），卻陪伴我度過自負的孤獨歲月。
我的對話只是自己的獨白。」
按呢寫出來个一本冊，真暢銷[thiòng-siau]，毋知這卜按怎解讀乎？
儂伊是踏著地位个儂，所以伊會凍遐摤勢[sáng-sè]，將「孤獨」兩字喝甲遐爾大聲。毋閣，咱通講，徛佇天德方[thian-tik-hng]，閣真孤獨个蔣勳，替千千萬萬lok佇坑溝仔內，嘛是真孤獨个儂，講出姻个心聲。
眾儂會來買伊个冊，毋但是予伊个名聲翕--著，是有影伊个文筆儹，內底所寫，出經入典，閣寫甲會siânn儂一直看--luè，而且有袂少觀點佮內涵，對咱有啟發。
伊有點出袂少問題，總是，伊是一个文藝儂，所議論个，難免表現出一種浪漫个想像。對古早儒家个精神，佮現時社會个病母，無影攏有真切个瞭解佮救方。
食過歐洲鹹水个蔣勳佮食過美國鹹水个洪蘭，攏真愛講儂外國按怎拄按怎好，咱家治按怎拄按怎bái。當然，姻有姻个理氣，但是，咱若看外國儂寫个冊，著會感覺，外國儂共款會排出無好味个空氣，而且姻家治嘛無的確有才調提出啥乜正實會改善个好法度。可能整體來講，姻有卡好。毋閣，迄種好，定定是直接抑是間接犧牲咱遮个國家所換--來个。當然，台灣本身，嘛是學姻即款àu步，一直塊犧牲比咱閣卡弱勢个國家。
我个儂，真koo-ta̍k（孤獨），啥乜都毋甘分--儂；抑若別儂塊興啥乜，我嘛攏閃遠遠。我嘛常在[tshiâng-tsāi]感覺真孤獨[koo-to̍k]，但是我卡罕得用koo-to̍k即个詞，我是講我內心个「空乏」[khong-hua̍t]、乏窩[ha̍t-o]，袂得通揣著任何外物來補thūn。無疑，會去買一本談論孤獨，閣大銷个冊，兩工著讀完。
毋是講，看了予咱攏同感个冊，才是好冊。凡若會凍興發[hing-huat]咱个思考，刺激[kik]咱繼續究勘[kiù-khàm]落去个，著是好冊。即本冊著是按呢。
2008年5月18日 星期日
越讀者
作者：郝明義[Hok-bîng-gī]
插圖：張妙如
出版社：網路與書出版
出版日期：2007年05月03日
語言：繁體中文 ISBN：9789866841026
裝訂：平裝
定價：280箍。佇Soidea七九折網購
頁數：255
「搜主義」(www.soidea.com.tw)規模卡細，拚俗搶生理，袂佇網頁註明存貨。是先接單，才想辦法去吊冊。定定愛等一兩禮拜才提會著，像我共買《越讀者》著是按呢。提有閣算好，有時，一段日子過去，才通知汝講吊無貨。
頭拄仔去看，發現伊改變做法，講「搜主義網書自即日起調整營業型態，轉為提供搜主義選書及市場新書銷售，書種上有所限制，卻希望提供您更專精、更迅速的購書服務」。伊開始限制書目，本來查有《越讀者》，即馬查無矣。看範勢[pān-sè]，拚俗正實做袂久長。儂講「俗卸卡贏寄[Sio̍k-sià khah iânn kià]」，當今个世界是無貨先搶單。
郝明義是台灣不止重要个出版人。我過去對伊無啥知，看即本冊，才發現以前注意著古lok-su̍t古个商務印書館會開始革新，原來是伊接手塊huānn个時所做个（總經理兼總編輯）。
插圖是《交換日記》系列个作者之一張妙如畫个。伊袂輸是徛佇作者佮讀者中間，用卡倚讀者个立場塊激肝田[kik-kan-tiân]講寡五四三个感想，予即本冊加添一寡輕鬆親切感。
毋閣郝明義干那佇後記講，佇真kiap个情形下，同意共這本冊做插畫个張妙如，予這本書加一份原底所無个感覺，佇遮共伊說謝。按呢扑算郝先生並無蓋看重[khuànn-tāng]張小姐對即本冊个貢獻个款。
郝明義 先談論台灣个教育體制對「閱讀」[ua̍t-tho̍k]風氣所造成个不良个影響。
2001年針對台北市、台中市、高雄市20歲以上个民眾所做个調查，讀冊个動機內底，「為著訓練獨立思考个能力」即項，普遍無儂重視。從中个大學生，除了課業要求个冊以外，偆个時間，若有看冊，永永是塊度時間、看藝量[gī-niū]个，即種情形，比別款職業个階層閣卡儕。
2007年有一場有關閱讀个研討會，詹麗萍發表講，台灣个大學生所看个冊是以休閒[hiu-hân]佮通俗个為主，罕得看經典名作，嘛真少去讀專業性、學術性个冊。可見即十年來个大學生攏共樣。
但是伊並無針對這提出啥乜解決个辦法，只是鼓舞讀者講，讀冊是一世儂个代誌，早開始有早開始个優勢，慢開始有慢開始个美妙。
伊講，除了愛情，無任何代誌像閱讀[ua̍t-tho̍k]按呢，予咱感覺晏[uànn]來个開始嘛會凍遮爾美好。
郝明義个觀點真包容。親像伊創立Net and Books，看名著知伊對新時代个網路對書冊即種傳統个資訊媒介有正面个相輔相成[siong hū siong sîng]、相傍相晟[sio pn̄g sio tshiânn]个作用。伊對書冊本身个逐種類型，嘛是一方面肯定伊个價值，一方面提醒伊个風險，並無任何一種是全然利益抑是全然敗害。
總是，愛有應伨[ìn-thīn]个配搭來享受各種精神上个食食[tsia̍h-si̍t]，嘛愛提昇眼光、培養品味通好[thang-hó]對某一種類型个冊內底揀出卡高明个作品，卡袂浪費性命。
伊是用「飲食」做比喻，將讀冊行為个型態分做「主食、美食、蔬果[soo-kó]、甜食」四類。
為著解決現實問題來讀冊，是主食閱讀。
為著瞭解事物个本質，得著性命深處个共鳴佮思想深處个結晶來讀冊是美食閱讀。
使用工具冊來查考資料是蔬果閱讀。
正頓食了，食寡甜=个紲喙尾[suà-tshuì-bué]，淡薄仔讀寡消遣冊，這是甜食閱讀。
即四種逐項攏有需要，嘛愛撙節[tsún-tsat]，毋通偏食。
論到冊个書寫種類，伊舉出小說、詩、哲學、歷史、圖像與漫畫、影像。每一項攏真有滋養[tsu-ióng]，請逐家攏去共斟酌[tsim-tsiok]體驗看覓。
論到讀冊个方法，伊舉出古早四个爻儂所提起个四種方法，陶淵明不求甚解、諸葛亮觀其大略、朱熹熟讀精思[sio̍k-tho̍k tsing-su]、蘇東坡八面受敵[pat biān siū ti̍k]。
伊認為每一種攏有伊个路用，咱愛會曉活用來讀無共性質个冊。有時針對一本好冊，看第一遍是觀其大略，第二遍是不求甚解，到第三遍才會凍熟讀精思。
伊嘛介紹現代西洋儂閣卡精密有系統个讀冊方法。
號做《越讀者》即種奇巧个名，「越[ua̍t]」--字佮「閱[ua̍t]」--字，華語共音，台語漳州腔嘛拄好共音（泉州音个「閱」是ia̍t。）
按呢號，是卜表達伊个主張－－閱讀是超越現實，望進[bāng-tsìn]理想佮夢想[bāng-sióng]；閱讀嘛是超越各種媒介、型態、種類、主題佮方法。
"Read the word"，同時亦是"Read the world"，閱讀予咱會凍不管時，隨手畫一个「任意門」，瞬息間轉移空間，入去任何一个新世界。
作者講，著準是愛情，嘛袂凍親像閱讀按呢予咱感覺，hānn過界个行為，會使遮爾新奇。
咱塊閱讀，有時講做是「博」，其實只是散漫；有時講做是「專」，究真[kiù-tsin]只是狹揳[e̍h-kheh]。
卜建立閱讀个金字塔，伊鼓勵儂著愛先選一个家治有興趣个小主題，研究甲相當有心得个坎站[khám-tsām]。然後做一个驗收，有才調徛佇一間大冊店內底，巡視怹佇即个主題所排出來个冊，講出怹个欠缺[khiàm-khueh]。而且去看當今即个主題个權威上新个文章，會凍理解，閣佮怹對話。
卜做好額儂，著愛先粒積一百萬，用這做母銀[bó-gîn]，錢咬錢，才會趁大錢。卜做一个閱讀个富翁，共款愛先充份掌握一个主題，用這當做汝个第一桶金子，才有法度累積智識个財富。
作者對各種角度探討閱讀即項物件，伊不時用譬喻[phì-jū]來予儂曉悟[hiáu-gōo]。最後，伊畫出伊心目中閱讀个七个gám仔（「閱讀的七個階梯」）。
第一gám：汝關心、思考个，是按怎予家治卡美好。
第二gám：汝開始關心、思考，按怎予家治佮所愛个儂，同齊卡美好。
第三gám：汝開始學習欣賞一切抽象个美好。
第四gám：汝開始學習欣賞社會制度个美好。
第五gám：汝開始學習欣賞佮家治各樣[koh-iūnn]个行為个美好。
第六gám：汝開始學習體會多元智識相激發[sio kik-huat]个美好。
第七gám：汝開始學習體會宇宙个智慧之美。
寫到遮，已經是峘拄天[kuân-tú-thinn]个理想之論。總是，無按呢，無夠額表達出作者心肝內迄个「閱讀全圖[ua̍t-tho̍k tsuân-tôo]」。
世間永遠只有極少數儂真正達會到迄種境界，咱做一个普通儂，檢采是予張妙如个漫畫siânn--著，才會去掀看即本冊。毋閣，只要汝撥一兩工仔歇睏日，好好仔讀完即本冊，保領[pó-niá]汝會凍得著一寡仔啟發，產生一屑仔想卜讀冊个好奇心，學著幾項仔選冊、讀冊个撇步。
2008年5月13日 星期二
吉川英治與吉本芭娜娜之間
作者：李長聲
有相片
出版社：網路與書出版
出版日期：2008年02月01日
語言：繁體中文 ISBN：9789866841217
裝訂：平裝
頁數：292
定價：320箍
頂日看完《讀書力》，普略仔知影日本冊个一寡情形。2008/05/10拜六佇誠品看著即本，著足有興趣。先買陳龍廷个《聽布袋戲－－一個臺灣口頭文學研究》，食暗飽，閣加買即本，閣佮楊斐華翻譯个《薄伽梵歌》、Julian Baggini原著，陳信宏翻譯个《一把鑰匙走進哲學》(Philosophy: Key Themes)。
作者李長聲是中國東北儂，本底佇中國做編輯，編過日本文學集，後來過日本寄跤二十幾冬，所致意个是日本个出版文化。按呢个背景，來紹介日本出版業予咱知，不止帶家[tuà-ka]。即本冊算是隨筆、漫談个總集。整理做「作家、出版人、書、工作者、獎與書評、流行、現象、漫畫」即八類。有講著純文學、流行文學、嘛有講著上大眾化，全世界綴姻袂著个个日本漫畫，種種出版品个儂、事、物。毋閣無提起著佇日本書局个店窗櫥[tiàm-thang-tû]真hiánn目个色情刊物。當然，日本漫畫內底愈來愈儕「有害內容」，總是，專門个色情圖書，伊無講著。聽講日本凊彩所在，攏有自動販賣機塊賣烏色个冊佮物，這扑算亦是全世界罕見个。
看完《讀書力》佮即部冊，閣去台中Sogo紀伊國屋[Kí-i-kok-ok]書店，看姻排出來个日本進口冊，著卡有概念矣。總是，我卡佮意啟蒙性質个「新書」，卡袂佮意小說為主个「文庫」。毋閣，文庫个冊，伊iá是排卡儕。
長期無才調讀日文，儼然是青盲牛，真iàn氣，我決意卜脫出即種無知，逐工拚勢學日文，現學現用。敬請列位貴君共小弟鬥鼓舞，感謝。
玄奘西遊記
作者：錢文忠
圖表：有彩圖、冊後附玄奘法師年表、魏朝至唐代西行求法高僧名錄
出版社：印刻
出版日期：2007年12月06日
語言：繁體中文 ISBN：9789866873485
裝訂：平裝
頁數：447
定價：499箍
中共中央電視台百家講壇內底有一季个節目，請上海復旦大學錢文忠教授來主講玄奘个一生。錢教授1966年出世，是錢賓四先生祧[thiāu]仔內个儂。伊拜季羨林先生為師，嘛佮季先生共款，閣去德國留學。對印度學、藏學、伊朗學、佛學攏真有研究。尤其是對梵語佮古代西域諸國个語言，特別瞭解，自然講會出一寡佛經語言方面，一般學者講無路來个學問。
玄奘法師孤師一儂，萬里走tsông，去到印度求法，十九年後轉來，閣用十九年久來進行翻譯，種種个過程，對即部冊深入淺出个介紹，予咱得著閣卡具體明朗[bîng-láng]个認捌[jīn-bat]。親像一尾烏肚蟲仔个咱儂，若有願力，用幾十年个性命，著會凍完成影響港千港萬年个大事業。加一个後代儂[āu-tē-lâng]受著古聖賢个感動，咱人類个存在，著加一分个意義。
2008年4月28日 星期一
讀書力
作者：齋藤孝(Takashi Saito)
譯者：陳昭蓉
出版社：台灣商務
出版日期：2006年11月01日
定價：240箍
讀書是一種「能力」，一種需要有意去培養訓練，對個人、社會攏真要緊个技能。
遮講个讀冊，毋是塊讀課本、教材，嘛毋是食飽傷閒塊讀gī-niū，是讀迄種會凍對咱有所提昇，需要帶有一點仔精神緊張，注神讀，讀完會凍得著成就感、充實感个冊。
平實感心个文字，講出讀冊个意義、分享讀冊个滋味，教儂讀冊个法度。透過讀冊，形成自我、鍛鍊[thuàn-liān]自我，拓展自我，學練向儂學習、佮儂溝通。
作者懇切建議每一个老師，逐遍上課，攏愛先用三分鐘久，共學生介紹老師家治最近塊讀个冊。用身教來引tshuā學生嘛變做是愛讀冊个儂。即點正正著是我即學期以來，tiu-tiu想卜做个代志！
開機
原冊名：Everything is Bad for you: How Today's Popular Culture is Actually Making us Smarter
作者：史蒂芬．強森(Steven Johnson)
譯者：蔡孟璇
出版社：早安財經
出版日期：2007年01月29日
中譯本冊名个副題是塊掛羊頭賣狗肉，即本冊根本毋是塊講「卜按怎？」是塊講「是按怎？」而且是塊講，現代流行文化个好个一面，是按怎予咱儂變卡巧。
作者考慮整體个流行文化个大趨勢，對每一世代受歡迎个電視節目、電影、電子遊戲、電腦軟體，共分析起來，一代比一代个產品，對大眾个腦智个要求漸漸哪峘。雖然色情、暴力个成分愈來愈儕、愈強，但是節目劇情个曲折複雜，人物關係个縈纏[înn-tînn]迷離[bê-lî]，受觀眾歡迎，對大眾个認知能力个提昇有真大个貢獻。
早上小三時完成一天工作
冊名：早上小三時完成一天工作－－60種超簡單時間管理技巧
作者：箱田忠昭(Hakoda Tadaaki)
吳鏘煌
出版社：春光
出版日期：2008年01月12日
定價：240箍
具體簡單个方法佮心理建設，鼓勵儂活出充實个一生。
「鯨千分法」，勿想講一項代志遐大遐煩，根本做袂了。勿懊惱過去，操煩未來，只是活佇當下，一擺做--寡，無ti無tang，著完成一項大空課矣。
中國大盜賊
冊名：中國大盜賊－－成王敗寇的潛規則
作者：高島俊男(Toshio Takashima)
譯者：張佑如
出版社：如果出版社
出版日期：2008年04月08日
定價：280箍
日本作家个觀點，來論中國歷史上个大賊古。成--者為王，敗--者為寇。陳勝、項羽敗、劉邦成。朱元璋勝。李自成敗。洪秀成成功一半。毛澤東成。
Tsin內底，敗个無好死。成个，享受不盡个榮華富貴。為著卜確保伊个富貴，劉、朱、毛攏用極粗殘个手段對付伊个功臣。對這點來看，中國歷史實在太烏暗。
作者佇頭序有講，即寡大賊古，姻íng-íng是用某種宗教抑是信仰當做心臟；用智識份子當做頭腦；用外圍个運搬工儂佮生理儂當做耳目；用儕儕田庄个流民當做跤手。按呢最後才拚倒舊朝代[tiâu-tē]，家治來做王。
中國歷代開國个平民皇帝，專專是陰thim奸巧、不仁不義个腳數[kioh-siàu]。
深夜加油站遇見蘇格拉底
冊名：深夜加油站遇見蘇格拉底
原冊名：Way of a Peaceful Warrior: A Book that Changes Lives
原文作者：Dan Millman
譯者：韓良憶
出版社：心靈工坊
出版日期：2007年09月12日
定價：260箍
原冊初版佇1980年代出版，拄開始無銷，三四年後出頭天，相爭儂呵咾。
這是一本半自傳，半小說个作品。作者寫出伊家治大學時代拄著一个心靈導師，受著啟發个經過。內底有真儕東方个思想。
我先看過電影，才買這本來看。冊比電影，對我來講卡好。一來電影時間有限，二來，我卡鈍，定定綴袂著電影个節奏。冊會使隨在我吸收个能力佮時間寬寬仔看。中譯本个文筆不止好。原文扑算亦是袂bái。
伊內底有一寡重要个開悟个坎站，是先生運用「超自然」个方式，予伊感受著一寡情景以後來發生个。這點我感覺卡小說化去。
上哈佛真正學到的事
冊名：上哈佛真正學到的事－－哈佛關鍵態度，帶你跨入領先群
作者：姜仁仙
譯者：蕭素菁
出版社：先覺
出版日期：2008年02月29日
定價：260箍
這本冊是一个韓國女記者寫个。伊佇職業場捙拚十冬，不止有成就。得著公司補助，予伊去美國Ha-bat(Harvard)大學讀一冬研究所。伊著哪讀冊，哪做採訪，出業後，完成這本報告，有影一兼二顧。
這本冊無講著啥乜卡具體个學習个法度。主要个著是副題所講个「關鍵(kuan-kiān)態度」。內底包括伊身為一个Ha-bat研究所菜鳥仔个心情變化，其他Ha-bat學生个訪問，別儂相關著作个精華，閣有一寡資訊。
伊有提起一點誠有景。Ha-bat鼓舞學生互相競爭，姻个商學院有一个相當嚴gâi个規定，一个學生若一學期有三科攏佇班上吊車尾（分數徛佇全班尾後十分之一），伊个記錄隨會出現佇學校行政人員个電腦螢幕頂面，按呢姻叫做"hit the screen"。一旦汝 "hit the screen"，教授著會組織一个委員會，叫汝去參詳，愛汝提出一个讀冊計畫，想辦法挽救家治个成績。雖然入來个學生，本底著攏已經是資歷hiánn-ba̍k个一流人才矣，但是逐年猶原會有幾个仔儂，因為拚同學袂過，姑不將來休學个。
若耶胡(Yale)大學著無共。姻無用制度來鼓舞學生相拚，成績無分級，干那分及格佮無及格兩種。但是學生家治iá是會自動自發，毋敢放鬆。
訂閱：
文章 (Atom)
