寫日記

對八月二一開始，逐工佇紙裡寫日記，有時袂記得，隔工著補起去。久無寫字，欲開始寫个時，閣著揣簿仔紙，發現一本十年前佇電腦公司食頭路寫日記个活頁筆記，迄陣一寡代誌，才按呢回想轉來。

古之學者為己，今之學者為人[Kóo tsi ha̍k--tsiá uī kí, kim tsi ha̍k--tsiá uī jîn.]。寫網誌是為人之學，寫紙本日記家治看是為己之學。為人之學做久，欲做為己之學，tshím-thâu--á煞袂慣勢。

Harry Potter 6 佮末日預言"Knowing"

今仔日去日新戲園看Harry Potter and the Half-Blood Prince，閣去萬代福看末日預言[Bua̍t-ji̍t Ū-giân] "Knowing"。第六集个Potter電影有夠歹看，做甲無lám無le̍h，看彼無彩工閣無彩錢。好佳哉有另外看著卡有意思个末日預言，而且佇無意中，看著即兩phō个關聯。

啥乜關聯？佮聖經个關聯。西洋儂佮聖經个關係，sian剝to剝袂lī。文藝創作者，幾千年佇遐捙跋píng，無了時，局不局[kio̍k-put-kio̍k]嘛是愛對聖經取素材來利用。即兩phō影戲，不約而同[put-iok jî tông]，攏用著舊約內底个The Chosen One(s)个概念[khài-liām]。

在阮異教徒來看，即兩phō電影个「作者」，對即種概念个表現，傳達出一種予儂感覺全然無助[bû-tsōo](helpless)个樣態[iūnn-thài]，身為一个有某種程度个自由意志个人類，予上帝揀召[kíng-tiàu]--著 亦好，無予揀召-著 亦好，攏是生命[sing-bīng]極大[ki̍k-tuā]个無奈。伊欲揀召汝、毋揀召汝，毋是汝會凍佮伊pué-huē个代誌。予揀召--著，佇箍仔內个極少數儂，欲按怎面對無予揀召--著，佇箍仔外个極多數儂咧？咱毋是互相無tī-tāi个存在，咱是親儂、朋友、厝邊，抑是互相依存个地球儂啊！

Harry Potter 6內底，善惡兩个陣營，共款攏有The Chosen One，受揀个儂，雖然有家治个意志，但是共款攏無可能推會lī身。無奈啊！痛苦啊！

末日預言內底，受揀个儂，會凍有自由意志拒絕受揀。女主角姻老母，扑算是袂當忍受目睭金金看家治至愛个查某囝，屬佇無hông揀召--著，註該死無[sí-bô]个迄類，家治獨活[to̍k-ua̍h]袂過心，只好用自殺來拒絕伊家治个受揀。

末日預言詮釋[tshuan-sik]聖經个方式，著親像我晉前所講个，將迄个日--時降雲柱[hûn-thiāu]、暝--時出火光个耶和華上帝解說做是駕駛太空船个外星儂。

網路頂看著，有儂佮意英雄救世个老套，所以對末日預言結局，主角白了工，無救著地球的戲文安排蓋袂爽，閣佇戲園內大聲tshoh罵。實在真好笑。

Tshian-tú-tshian，今仔日我身軀頂，拄好phāinn一本白話字聖經！毋閣，電影內底引用个以西結迄本，我愛閣相當期日才讀會到遐。總是，我掀去遐看一下，又閣讀著按呢个話句：

「所以我用我个痛恨摒佇怹个頂面，用我大受氣个火滅怹；照怹所行个，報應佇怹个頭殼頂；這是主耶和華上帝講个。」（以西結22: 31. 白話字聖經舊約第937頁）

看完頭前兩百統頁个我，跳到937頁猶原看著共款來自上帝个「受氣、報應、火、滅」个字眼，按呢，我是毋是應該會使出結論講：無錯，舊約个上帝，有影親像我想个，是一个直來直去，對好儂慈悲、對歹儂殘忍，隨時會生養[sing-ióng]一切，嘛隨時會勦滅[tsâu-bia̍t]一切个神？

檢彩按呢个上帝，著是一寡虔誠个基督徒，怹會投入政治運動，攑軍器抵敵[tí-ti̍k]不義个精神力量个來源。親像傅雲欽先生按呢，套用聖經个話句佇政治个現況[hiān-hóng]，來表達伊欲消滅賣台者[bē-tâi-tsiá]个決心。

佛教卡無即種个，一--來是教義各樣；二--來是若有按呢做个，扑算攏予儂歸類做「附佛外道[hū-hu̍t guā-tō]」去矣，親像白蓮教[Pi̍k-liân-kàu]遐个。兩項因素交互影響。

按呢，即兩phō影戲个作者，到底會予「正統」个基督教歸類做「附聖經个異端」袂？怹是毋是藉[tsià]聖經塊反聖經？怹有uai-tsuāi聖經个教義無？怹是毋是予撒旦揀召--著个儂，這毋是我現時个程度會凍議論个。

「世界末日」个可能性，予蓋濟儂塊peh-pak。總是，我想，若逐家同齊死滅，嘛是好。卡應該恐怖驚惶个，應該是儂儂會死，而且有个先死、有个慢死這層通儂知，無儂疑个代誌！欲按怎？欲按怎？

現步我對聖經个看法

(2009-07-08)
以下是寫予少年朋友，一个敬虔个耶和華見證人，講著我最近讀聖經个一寡無成熟、未定著个想法，內底个漢字，除了「儂」以外，攏照教育部所推薦个，佮我慣勢用个無同[bô-tâng]。

---

舊約我已經讀完四本，也就是摩西五經已經讀完五份四[gōo-hūn-sì]。我會繼續耐心讀落去。

我欲共你講，對一个食菜戒殺的異教徒(inn7-kau3-too5)來講，欲體會兩三千年前的以色列儂所寫的冊，怹講彼是造萬物之主上帝的話語，實在真食力。

到目前為止，我對摩西五經前四經所感受著的上帝，是一个直來直去，目睭賠目睭、喙齒賠喙齒，你聽我的話，我就予你牛羊、土地、平安快樂；你無聽我的話，毋拜我，去拜別的神明，我就變面受氣，予你規家伙、規家族、規民族攏總死甲足歹看的神明。

而且伊一遍閣一遍交代摩西，吩咐以色列儂，著愛按怎刣牛倒羊，用活物的肉、血、油，燒予芳芳，共伊祭拜，甚至用手活活 tsun7斷鳥仔的頷頸，用血hiu3祭壇，來共伊拜。

類似按呢的內容，充滿佇我所看完的兩百頁紙張內底，行過賣臊物(tsho-mih8)的食食(tsiah8-sit8)店，攏會無爽快的我，愛予我的心硬，才看會落去。

按呢的要求，耶和華後來敢捌顯現出來共信徒講，以後恁毋免閣按呢拜我矣，敢有？我臆是無。只是因為歷史的變遷，所以後來的信徒無按呢做？若按呢，後來一直到今仔日的基督徒攏違背耶和華的交代矣。抑是因為有一寡先知，抑是耶穌講，因為上帝佮咱的約定改矣，所以，咱以後莫閣刣牛刣羊刣鳥仔拜上帝矣，只要讀經、祈禱、靈修就好？我毋知，我會繼續讀落去，看後壁有講無。

我所看著的摩西前四經，是以色列儂按怎對埃及逃亡出來以來，行到佗位，就刣儂、搶掠
(tshiunn2-liah8)到佗位的歷史。怹的理由，就是：因為其他的民族攏總毋拜耶和華，獨獨以色列族，閣願意勉強拜耶和華，所以其他的民族，攏總愛予死；iah以色列儂的中間，若有信心無堅定的，佇半路中踅踅唸，發出不滿的聲音的，耶和華共款會降災禍(tsai-e7)、瘟疫(un-ik8)，予怹死，怹無別項選擇。連摩西嘛因為捌有一擺無啥尊重耶和華，所以耶和華後來就毋准伊行到迦南地，予伊死佇半路。

以色列儂將別个民族，有作戰能力的tsa-poo丁攏總刣死了後，將婦女佮囡仔掠轉來。摩西知影，真受氣，共怹罵。叫怹愛閣將遮个完全無抵抗能力个婦孺(hu7-ju5)攏總刣死，kan-na留毋捌佮tsa-poo同房(tang5-pang5)个查某囡仔。（留落來以後，按怎對待怹，我無看著，我嘛毋敢烏白想。）

我懷疑，舊約的上帝，佮新約內底，耶穌所講的上帝，毋是共一个上帝。

我有另外買一寡解說聖經的冊來看，親像盧俊義牧師的《牧師，我有問題--舊約篇》，伊的解說，有予我加知影一點仔彼陣的歷史，但是並無化解我以上的懷疑。

有一个真大的問題，就是，耶和華並毋是顯現佇全以色列儂，當然，嘛無顯現佇你我的面前，
講出伊的誡命(kai3-bing7)，伊是透過傳話者，親像摩西的喙來予咱知的，咱欲按怎知影摩西遮的先知的喙，真正攏照造物主上帝的意志講話，無參雜(tsham-tsap8)伊個人的意志？

目前个我，較欽服(khim-hok8)耶穌的所行(soo2-kiann5)所講。

我毋但會繼續耐心讀落去，我嘛會調整心態，盡量用閣較謙虛的心來讀，總是，這真無簡單。

阮異教徒所信仰(sin3-giong2)的典型(tian2-hing5)，是無論按怎，攏袂受氣，永遠用無邊無盡的慈悲心、憐憫心(lin5-bin2-sim)來對待一切眾生，絕對袂傷害怹、閣欲想盡一切辦法解救怹脫離一切痛苦的覺悟者。

科元

被縛受苦

被縛受苦[pī-pa̍k siū-khóo]个靈魂，應該愛得著tháu-pàng。

南無觀自在菩薩

南無觀自在菩薩

南無觀自在菩薩

窮斯濫矣[kiong5# su# lam7--i2]

Tso̍h日暗講今後[kim-hiō]欲十二點晉前去睏。過兩工矣，嘛是無改變[ké-pìnn]。

因為逃避心[tô-pī-sim]个病母無除，想無步通對治[tuì-tī]--伊，致到[tì-kàu]歸个生活攏ki-ki kô-kô。這著是「窮斯濫矣」[kiông# su# lām--í]。

人我是非

儂个一生，íng是佇人我是非[jîn#ngóo#sī-hu]个中間塊phah-siak。因為有見笑心，所以儂會改惡從善[kái-ok tsiông-siān]，但是嘛因為共即个心，所以儂會見笑轉受氣[tńg siūnn-khì]。做出真濟無理性个所行[sóo-kiânn]，滾絞[kún-ká]袂煞，苦痛[khóo-thàng]無了時。

欲按怎才會凍無我相、無人相、無眾生相，一面又閣會凍做一个有尊嚴个儂？

持戒、忍辱，又閣會凍布施，愛有真大的勇氣。

堅持雅操

千字文[Tshian-jū-bûn]古早是訓蒙必讀[hùn-bông pit tho̍k]，總是，先生會共囡仔解說意思个，恐驚無濟。伊內容tsa̍t-pak，文辭典重[tián-tiōng]，佇一个特殊限制之下，亦著是字眼袂使出現兩擺，周興嗣[Tsiu Hing-sū]先生一暗著ka做出來，激頭腦激甲頭毛喙鬚白，袂怪[kuè]得予儂千古傳頌[tshian-kóo thuân-siōng]。

從中有一句「堅持雅操」，我定定想著。廈門音讀做 kian-tshî ngá-tshò，台灣漳州音是 kian-tî ngé-tshò。

「操」--字，佇遮是名詞，愛讀陰去聲。曹操[Tsô Tshò]个「操」，台語嘛是讀陰去聲，毋是華語唸个陰平聲。操行[tshò-hīng]、節操[tsiat-tshò]、貞操[tsing-tshò]、志操[tsì-tshò]嘛是陰去聲。

「雅操」是雅氣、美好个志行[tsì-hīng]，內心佮外在个行為攏包括[pau-kuat]在內。

堅持雅操，佮佛法講个「執持淨戒」[tsip-tshî tsīng-kài]是相通个。

我愛共即兩句八字分別tshiah踮兩爿手心。隨時thián手起來看。

照起工做歇[tsò-hioh]、照時間食睏，嘛是基本个雅操。我kan-na實行短短一兩禮拜，著閣溜尾[liu-bué]去矣。即陣半暝一點二十，來去睏，明仔載毋通超過十二點睏。

ka-nng5个事工

Phāinn一个儂殼，lio̍h-á-heh腹肚著枵餓[iau-gō]，lio̍h-á-heh精神著困倦[khùn-kuān]。要緊著卡猛[khah-mé]趁袂枵袂siān个中間，加做寡有意義的代誌，閣著共伊貫串[kuàn-tshuàn]起來，tsiânn做ka-nn̂g个事工，承先啟後[sîng-sian khé-hiō]。

第一影城

第一遍去台中車頭前个第一影城看二輪片。遐卡濟五色儂[ngóo-sik-lâng]塊出入，佮萬代福卡濟學生囡仔有縒[tsua̍h]。

雖罔是車頭前、市中心，彼是一棟不止衰颯[sue-sap]个大樓。電梯gám仔个縫--仔，一tsuā一tsuā，kha̍h真濟lah-sap，予我想著一般正常經營个百貨公司，會凍維持甲遐清氣，清潔人員个苦勞。

第一影城內底有八廳，十六支片（？）塊放送。一張票百一箍予儂看一工，半中tn̂g會使行出來，伸手盤予顧口--个tǹg一个印仔，出外lau-lau咧才閣入去看，算是不止利便。另外閣送飲料、磅米芳、撞球點數有个無个，彼我無用著。

影城內底个建設，有卡倚近定定佇我夢中出現个款式矣。總是，我想，夢中个戲園，古古，佮第一影城个舊舊，各樣。彼應該是我頂世儂所去的跡[jiah]。

下昏暗看兩齣，「守護者」、「橫山家之味[Hîng-san--ka tsi Bī]」。

戲園敗市嘛有年矣。第一影城儂客幾个仔，伊用種種个優待勉強弓椆咧，毋知會通tòng到ti̍h時？

電影院扑算是一个烏暗个所在，即號半舊lo̍h个，閣卡是按呢。

啥事欲去看電影？

我个身、心，欲按怎安立？

Hoâi-tek-hui ê Toān-kì

Hoâi-tek-hui ê Toān-kì
Lōa Jîn-seng Phian-e̍k
1955 nî 10 ge̍h 20 ji̍t, Tâi-oân Soan-tō-hōe chhut-pán.
2008 nî 3 ge̍h, Kàu-hōe Kong-pò Chhut-pán-siā hoan-ìn.

正文36頁，一工內，佇三間餐廳，最後佇租个厝讀完。這顯明我个心無安定[an-tiānn]。

閣紲落去，讀一學期晉前看過一寡仔迄本郝明義[Hok Bîng-gī]个《故事》。閣寫網誌。閣看黃海岱老師[ló-su]个「大唐演義」。傳藝中心共伊彚集[luī-tsi̍p]迄套布袋戲精選系列，十五集我看過九集，專攏武戲。Haih! 無通看著親像鍾任壁[Tsiong Jīm-phik]老師「一門三進士[It-bûn Sam Tsìn-sū]」遐精彩个文戲，失望啊！閣來，看學生个網誌。

"Goá chiàⁿ-chiàⁿ sī thèng-hāu Siōng-tè ê si-un pang-chān, in-uī góa chhim-chai I beh koh chi̍t-pái hû-chhî góa, hō^.góa ē hōng I ê miâ kóng-ōe."

看著 "I"，我一時失神，心肝內煞自動轉換。讀做是「我」。佮英語个 "I" 錯亂去。

我袂曉講台語、寫台文，袂凍志行貞切[tsì-hīng tsing-tshiat]去行[kiânn]我个義路，我个心不止大憂悶。

出埃及矣

(2009-06-24) 已經讀完〈創世記〉佮〈出埃及記〉。〈出埃及記〉愈看煞愈感覺儂講上帝其實是外星儂，毋是無影，冊裡線索不止濟。（有一本冊个冊名著是按呢寫，但是我並無掀起來看）

我是異教徒，讀這聖經，主要是欲學台語，無啥宗教的[tik]个虔誠，真歹勢。總是，我無予儂引tshuā，無讀儂个詮釋[tshuan-sik]，phīng家治个成見來讀。先老實將一寡感受佮聯想記落來，別日若眼界較開闊[khui-khuah]，悔悟[hué-gōo] íng時講出喙个罪愆[tsuē-khian]，會閣轉來遮求赦免。

上古著有濟濟種族，逐種族所拜个「上帝」各樣[koh-iūnn]，從中，以色列儂个上帝權能[kuân-lîng]極大，通隨意施恩典[si un-tián]、降災禍[kàng tsai-ē]予萬百姓[bān peh-sìnn]；亦通控制儂个心理佮腦智，無論是正面賜儂有聰明[tshang-miâ]、有知捌[tsai-bat]、予儂心有靈竅[lîng-khiàu]；或者是負面予儂个心 硬，刁工欲予怹來對抗上帝。這一切个行做[kiânn-tsuè]攏是上帝欲對儂顯明伊才是獨尊[to̍k-tsun]个上帝。

即个上帝，愛儂獻出種種个祭物[tsè-mi̍h]予伊，油、血、禽獸[khîm-siù]个肉、香料[hiunn-liāu]、貴金屬、寶石，伊可能需要遮个物質來製造、補充能量。

上帝个身軀佮伊个祭壇[tsè-tuânn]（製造能量个基地？核子[hi̍k-tsú]反應爐？），會射出強烈的輻射線[hok-siā-suànn]。地球儂若無遮[jia]無khàm，倚過去，現死。尤其是伊个面，輻射線上強，著準伊有用保護罩[tà]共汝遮咧，面對面sio相[siòng]，汝猶原看袂出伊个面孔[bīn-kháng]。

即个上帝，對伊家治个所行[sóo-kiânn]，有時亦會退悔[thè-hué]，親像伊看著家治創造出來个儂，生湠濟濟，儂儂為非糝做[uî-hui sám-tsò]，伊真後悔，歸氣攏共剿滅[tsâu-bia̍t]掉，重來。閣親像伊本底是定著欲予眾儂死，若有一个素常有聽趁[thiann-thàn]伊喙个儂去共伊姑情，伊嘛是會落軟，放煞--去。

上帝已經離開地球幾落千年久，繼續伊太空旅行个路站。但是伊迄當時賜福予以色列儂，用特別个輻射線改造怹个遺傳基因，甚至有鑲入[siunn-ji̍]生物性的電子線路佇內底，予怹到今[tann]猶[iáu]是代代出gâu儂，閣會通佮上帝佇外太空的智識資料庫做連線（年代太久啦，訊號無通好），成做地面上[tē-bīn-tsiūnn]，儂額無濟，但是上蓋有影響力个民族。

以上[í-tsiūnn]，攏是我個人个幻想，請毋通掠做正經。儂講，天機不可sia̍p-lāu，無通[thang]遐凊彩著予我講--著。

巴克禮牧師白話字聖經

開始讀巴克禮牧師主譯个白話字舊約聖經，本底是想講愛逐日至少讀四頁，但是不接一[put-tsiap-it]，有時兩日無讀，有時，一日讀十幾頁。總是，即馬進行到89頁，出埃及記25章[tsiunn]。

有冊通讀，真幸福；有經典通讀，是大福報，愛珍惜，愛綿爛。

後日，我卜閣將全套个白話字教會公報攏讀完。

對聖經、對古冊戲、對種種个文獻、對老先生个錄音，來建置我心目中tsiâu-tsn̂g个台語、台文。

生死

細漢定定殺生，佮死之欲[sú tsi io̍k]塊盤撋[puânn-nuá]；大漢不時淫亂[îm-luān]，佮生之欲[sing tsi io̍k]塊長佮[tn̂g-kah]。殺生迄爿，有消蝕[siau-si̍h]--淡薄；淫亂即爿，sian lut to lut袂凍落。這著註定沈淪火宅[tîm-lûn hónn-ti̍k]，永遠無有出離[tshut-lī]的一日。

「沈淪」是「水」，「火宅」是「火」，水火同源[tsuí-hué tông-guân]，生死[senn-sí] ia̍h同源。

中華民國个國歌，其中引用的古文「夙夜匪懈[siok-iā huí hāi]」，真有理氣。

放生[pàng-senn]

歸陣蟉蠽拚出岫
看著會驚跤手勼
我對小強真幼秀
放怹逃生去自由

Kui-tīn ka-tsua̍h piànn tshut siū.
Khuànn-tio̍h ē kiann kha-tshiú kiu.
Guá tuì sió-kiông tsin iù-siù.
Pàng in tô-senn khì tsū-iû.

念頭

舊約聖經創世記：耶和華看見儂佇地上，罪惡真大，心內所想个念頭逐日攏是歹。

地藏經：閻浮提罪苦眾生，起心動念，無非是業，無非是罪。

音註：閻浮提：Iâm-hiô-thê。「閻」白音 giâm，文音 iâm。「浮」唸 hiô 是泉腔文音。

予共房同窗个一張批

楊大个：

真誠感謝汝遮爾好意，來共我通知同窗會个消息。即兩工我一直塊躊躇，欲去抑毋去…。即陣我拄對學校轉來，想欲寫mail予汝，才發現迄工抄落來个資料，留佇研究室無紮--轉來，可見我有夠無誠意，實在真不住。

做一个會計系的「叛徒」[puān-tôo]，二十冬過去，講事業--mih無出脫，講學問--mih半桶屎，講家庭--mih無某無猴，有影是無一路取[bô tsi̍t-lōo-tshú]，講著會見笑死--去[--ì]。

讀會計系的時，予汝真照顧，一直無共汝說謝。

有一暗，我對山跤起來，神經線相旆[sio-phua̍h]，入來寢室，面仔漚[àu]-tū-tū，歸箍儂siàng咧眠床頂，過一睏仔，汝佮濱--a開始對喙講古，一个演廖添丁，一个學紅龜--个，汝一句去，伊一句來，兩个講著有夠suah-phah，我佇另外一爿个頂鋪[phoo]，聽甲tsuan9笑出來。予恁費神，感謝恁。

我卡有歲，煞卡毋捌代誌，言語行動，種種無檢點，親像踮寢室食薰，足無公德心，傷害恁个健康，予恁無爽快，真失禮。其他卡大條个，毋知閣有外濟咧。

阿姿是一个好學深思个查某囡仔，一年个時，伊定定問我一寡思想个問題，我即个草包，無才調應[ìn]，只好幌頭[hàinn-thâu]。我捌去過台中怹兜拜訪，怹媽媽一直請阮著好好仔照顧伊。伊後來學業無順，我從來毋捌主動去揣伊，共伊關心一下，連伊轉過幾个系，我都毋知。

閣共班个時，有一遍，我想欲送伊一塊「新世界交響曲」，問伊捌聽過無，隔工，伊煞挓錄音帶來欲借我，我想欲送伊个物件tsuan9無送出去。我有一个屜仔[thuah-á]，屜--開，內底攏是伊送我个物件。我正港是一箍無血無目屎个柴頭。

有欲予恁兩个千金學鋼琴無？細漢學音樂，直正蓋要緊。毋是欲靠彼食飯，是欲予囡仔一世儂攏有通[thang]消tháu怹个情緒，提昇怹个精神，佇即个偓促[ak-tsak]甲走無路个世界，閣有一个抽退个所在。

嫂--a扑算會曉彈鋼琴，親子同齊來享受音樂，是上幸福个代誌。父母若攏無基礎，趁即个機會佮囡仔做伙成長，是上蓋好个。

明仔載我會閣去阮學校，指導學生修改畢業作品。同窗會我著無去矣。閣二十年後，恁若閣有辦同窗會，我若閣有佇即个塵世，才拜託恁閣共我通知--一聲，我若行會tín動，著會來參加。即擺个聚會，若有方便，才勞煩汝轉達我對恁逐家个感念佮祝福。

科元

腦智

照佛法塊講，儂儂攏有無限量个智慧藏性[tì-huī tsōng-sìng]，總是，多數儂个腦智，表現會得出个，是差毋成物(m̄-tsiânn-mi̍h)，記會椆腹、學會通tháu的物件，範圍、深度攏真有限。

有袂少資料、課程，塊教儂開發家治个腦智，從中，記持這項，真濟冊，叫儂著用聯想法，佇頭殼內，編[phian]一站古，將愛記的項目，隨个仔隨个轉化做故事中一路發生的事物。我無啥信重[sìn-tiōng]這號步數，驚了彼會增長[tsing-tióng]妄念。

往過[íng-kuè]，我个心捌予妄念齪造[tsak-tsō]甲足食力。